ਰੋਬੋਟਾਂ ਦੀਆਂ ‘ਓਲੰਪਿਕ’ ਖੇਡਾਂ: ਬੀਜਿੰਗ ’ਚ 500 ਤੋਂ ਵੱਧ ਰੋਬੋਟਾਂ ਨੇ ਦੌੜ, ਫੁੱਟਬਾਲ ਤੇ ਮੁੱਕੇਬਾਜ਼ੀ ’ਚ ਲਿਆ ਹਿੱਸਾ

ਚੀਨ ਦੀ ਰਾਜਧਾਨੀ ਬੀਜਿੰਗ ਵਿੱਚ ਅਗਸਤ ਵਿੱਚ ਇੱਕ ਅਨੋਖਾ ਖੇਡ ਮੇਲਾ ਹੋਇਆ, ਜਿਸ ਵਿੱਚ ਖਿਡਾਰੀ ਇਨਸਾਨ ਨਹੀਂ ਸਗੋਂ ਰੋਬੋਟ ਸਨ। 14 ਅਗਸਤ ਨੂੰ ਸ਼ੁਰੂ ਹੋਈਆਂ ਦੁਨੀਆ ਦੀਆਂ ਪਹਿਲੀਆਂ ‘ਵਰਲਡ ਹਿਊਮਨੌਇਡ ਰੋਬੋਟ ਗੇਮਜ਼’ 17 ਅਗਸਤ ਨੂੰ ਸਮਾਪਤ ਹੋਈਆਂ।

ਇਨ੍ਹਾਂ ਖੇਡਾਂ ਵਿੱਚ 16 ਦੇਸ਼ਾਂ ਦੀਆਂ 280 ਟੀਮਾਂ ਦੇ 500 ਤੋਂ ਵੱਧ ਇਨਸਾਨੀ ਸ਼ਕਲ ਵਾਲੇ ਰੋਬੋਟਾਂ ਨੇ ਹਿੱਸਾ ਲਿਆ। ਕੁੱਲ 26 ਮੁਕਾਬਲਿਆਂ ਵਿੱਚ ਦੌੜ, ਫੁੱਟਬਾਲ, ਮੁੱਕੇਬਾਜ਼ੀ ਅਤੇ ਡਾਂਸ ਦੇ ਨਾਲ-ਨਾਲ ਸਫ਼ਾਈ ਕਰਨ ਅਤੇ ਦਵਾਈਆਂ ਛਾਂਟਣ ਵਰਗੇ ਕੰਮ ਵੀ ਸ਼ਾਮਲ ਸਨ।

100 ਮੀਟਰ ਦੀ ਦੌੜ ਵਿੱਚ ਸਭ ਤੋਂ ਤੇਜ਼ ਰੋਬੋਟ ਨੇ ਲਗਭਗ 21.5 ਸਕਿੰਟ ਦਾ ਸਮਾਂ ਕੱਢਿਆ। ਪੰਜ-ਪੰਜ ਰੋਬੋਟਾਂ ਵਾਲੇ ਫੁੱਟਬਾਲ ਮੁਕਾਬਲੇ ਵਿੱਚ ਚੀਨ ਦੀ ਸਿੰਗਹੁਆ ਯੂਨੀਵਰਸਿਟੀ ਦੀ ਟੀਮ ਨੇ ਜਰਮਨੀ ਦੀ ਸਾਂਝੀ ਟੀਮ ਨੂੰ ਹਰਾ ਕੇ ਖ਼ਿਤਾਬ ਜਿੱਤਿਆ।

ਪਰ ਸਭ ਤੋਂ ਵੱਧ ਚਰਚਾ ਰੋਬੋਟਾਂ ਦੇ ਡਿੱਗਣ ਦੀ ਹੋਈ। ਫੁੱਟਬਾਲ ਵਿੱਚ ਰੋਬੋਟ ਜ਼ਰਾ ਜਿੰਨੀ ਟੱਕਰ ਨਾਲ ਇੱਕ-ਦੂਜੇ ਉੱਤੇ ਡਿੱਗ ਪੈਂਦੇ, ਰਿਲੇਅ ਦੌੜ ਵਿੱਚ ਆਪਸ ’ਚ ਟਕਰਾ ਗਏ ਅਤੇ ਮੁੱਕੇਬਾਜ਼ ਰੋਬੋਟ ਕਿੱਕ ਖੁੰਝਣ ’ਤੇ ਖ਼ੁਦ ਹੀ ਲੁੜਕ ਜਾਂਦੇ ਸਨ।

ਇਨ੍ਹਾਂ ਮਜ਼ੇਦਾਰ ਦ੍ਰਿਸ਼ਾਂ ਦੇ ਬਾਵਜੂਦ ਮਾਹਿਰਾਂ ਨੇ ਕਿਹਾ ਕਿ ਇਨ੍ਹਾਂ ਖੇਡਾਂ ਨੇ ਰੋਬੋਟ ਤਕਨੀਕ ਦੀ ਤਰੱਕੀ ਅਤੇ ਉਸ ਅੱਗੇ ਖੜ੍ਹੀਆਂ ਚੁਣੌਤੀਆਂ, ਦੋਵਾਂ ਨੂੰ ਦੁਨੀਆ ਸਾਹਮਣੇ ਰੱਖ ਦਿੱਤਾ।