100 ਸਾਲਾਂ ’ਚ ਪਹਿਲੀ ਵਾਰ: ਦੁਨੀਆ ਦੇ ਸਭ ਤੋਂ ਭਾਰੇ ਸਕੁਇਡ ਦਾ ਬੱਚਾ ਸਮੁੰਦਰ ’ਚ ਕੈਮਰੇ ’ਚ ਕੈਦ

ਸਮੁੰਦਰ ਦੀਆਂ ਡੂੰਘਾਈਆਂ ਤੋਂ ਇੱਕ ਹੈਰਾਨੀਜਨਕ ਖ਼ਬਰ ਆਈ ਹੈ। ਵਿਗਿਆਨੀਆਂ ਨੇ ਪਹਿਲੀ ਵਾਰ ਕੋਲੋਸਲ ਸਕੁਇਡ ਨੂੰ ਉਸ ਦੇ ਕੁਦਰਤੀ ਘਰ ਵਿੱਚ ਜਿਊਂਦਾ ਤੈਰਦੇ ਹੋਏ ਕੈਮਰੇ ਵਿੱਚ ਕੈਦ ਕੀਤਾ ਹੈ, ਜਿਸ ਦਾ ਐਲਾਨ 15 ਅਪ੍ਰੈਲ ਨੂੰ ਕੀਤਾ ਗਿਆ।

ਇਹ ਵੀਡੀਓ 9 ਮਾਰਚ ਨੂੰ ਦੱਖਣੀ ਅਟਲਾਂਟਿਕ ਮਹਾਂਸਾਗਰ ਵਿੱਚ ਸਾਊਥ ਸੈਂਡਵਿਚ ਟਾਪੂਆਂ ਨੇੜੇ ਲਗਭਗ 600 ਮੀਟਰ ਦੀ ਡੂੰਘਾਈ ’ਤੇ ਬਣਾਈ ਗਈ। ਸ਼ਮਿਟ ਓਸ਼ਨ ਇੰਸਟੀਚਿਊਟ ਦੇ ਜਹਾਜ਼ ਤੋਂ ਭੇਜੇ ਗਏ ਰਿਮੋਟ ਨਾਲ ਚੱਲਣ ਵਾਲੇ ਰੋਬੋਟ ‘ਸੁਬੈਸਟੀਅਨ’ ਨੇ ਇਹ ਦ੍ਰਿਸ਼ ਰਿਕਾਰਡ ਕੀਤਾ।

ਮਜ਼ੇਦਾਰ ਗੱਲ ਇਹ ਹੈ ਕਿ ਕੈਮਰੇ ਵਿੱਚ ਆਇਆ ਸਕੁਇਡ ਇੱਕ ਬੱਚਾ ਸੀ, ਜਿਸ ਦੀ ਲੰਬਾਈ ਸਿਰਫ਼ ਲਗਭਗ 30 ਸੈਂਟੀਮੀਟਰ ਸੀ। ਇਹ ਲਗਭਗ ਪਾਰਦਰਸ਼ੀ ਦਿਸਦਾ ਹੈ, ਕਿਉਂਕਿ ਕੋਲੋਸਲ ਸਕੁਇਡ ‘ਗਲਾਸ ਸਕੁਇਡ’ ਪਰਿਵਾਰ ਨਾਲ ਸਬੰਧ ਰੱਖਦਾ ਹੈ।

ਵੱਡਾ ਹੋ ਕੇ ਕੋਲੋਸਲ ਸਕੁਇਡ 7 ਮੀਟਰ ਤੱਕ ਲੰਮਾ ਅਤੇ ਲਗਭਗ 500 ਕਿੱਲੋ ਤੱਕ ਭਾਰਾ ਹੋ ਸਕਦਾ ਹੈ, ਜਿਸ ਕਾਰਨ ਇਸ ਨੂੰ ਧਰਤੀ ਦਾ ਸਭ ਤੋਂ ਭਾਰਾ ਬਿਨਾਂ ਰੀੜ੍ਹ ਦੀ ਹੱਡੀ ਵਾਲਾ ਜੀਵ ਮੰਨਿਆ ਜਾਂਦਾ ਹੈ।

ਇਸ ਜੀਵ ਦੀ ਪਛਾਣ 1925 ਵਿੱਚ ਹੋਈ ਸੀ, ਪਰ ਪੂਰੇ 100 ਸਾਲਾਂ ਤੱਕ ਕਿਸੇ ਨੇ ਇਸ ਨੂੰ ਸਮੁੰਦਰ ਵਿੱਚ ਜਿਊਂਦਾ ਨਹੀਂ ਦੇਖਿਆ ਸੀ। ਇਸੇ ਮੁਹਿੰਮ ਦੌਰਾਨ ਜਨਵਰੀ ਵਿੱਚ ਅੰਟਾਰਕਟਿਕਾ ਨੇੜੇ ਗਲਾਸ ਸਕੁਇਡ ਦੀ ਇੱਕ ਹੋਰ ਕਿਸਮ ਵੀ ਪਹਿਲੀ ਵਾਰ ਜਿਊਂਦੀ ਕੈਮਰੇ ’ਚ ਕੈਦ ਹੋਈ ਸੀ।